माओवादी अध्यक्ष प्रचण्ड उम्मेदवार रहेको सिरहा ५ का तीनवटा मतदान केन्द्रमा माओवादीले बुथ कव्जा गर्दा पनि प्रहरी, प्रशासन र निर्वाचन कार्यालयले सुनुवाई नगरेको गुनासो एमालेले गरेको छ ।
प्रचण्डले निकै सुरक्षित ठानेर रोजेको क्षेत्रमा कडा टक्कर दिएका एमालेका लीलानाथ श्रेष्ठले दिउँसो २ बजेसम्ममा माओवादीले कम्तीमा २ हजार ५ सय मत खसालेको आरोप लगाएका छौं।
‘हामीले जताततै गुनासो गर्दा पनि सुनुवाई भएन,’ उनले टेलिफोनमा सेतोपाटीसित भने, ‘अरु मतदान केन्द्रमा हाम्रो पक्षमा सानदार लहर देखिएको छ ।’
श्रेष्ठका अनुसार बडारामाला–९, बडारामाला– ६ भुल्के र कल्याणपुर ९ को मरेवा बुथ माओवादीले २ बजेसम्म कव्जा गरेको हो । ‘हाम्रा प्रतिनिधिलाई छिर्न समेत नदिई भोटिङ् सुरु भयो,’ उनले भने, ‘धेरै भोट खसालिसकेपछि बल्ल हाम्रा प्रतिनिधिलाई प्रवेश दिइयो ।’ माओवादीले एकलौटी गरेको विषयमा कतैबाट सुनुवाई नभएपछि एमालेले निर्वाचन अधिकृत समक्ष उजुरी हाल्ने भएको छ ।
‘वकिल साथिहरुलाई उजुरी लेख्न लगाइसकेको छु,’ उनले भने । बढारामाला जिल्लाकै सर्वाधिक भोट भएको गाविस हो । सोहि गाविसको वडा नम्बर ५ मा माओवादीले पाँच सय मत कव्जा गरेको एमाले निकट युवा संघका सदस्य इन्द्रेसकुमार राउतले बताए । सिरहा ५ मा अघिल्लो निर्वाचनमा माओवादीका महेन्द्र पासवानले एमाले भन्दा झण्डै दोव्वर मत ल्याएको थियो । माओवादीले अघिल्लो निर्वाचनमा ल्याएको बाह्र हजार भन्दा बढि मतमा जनमोर्चा र अर्को बाम घटकले त्यतिबेला ल्याएको जोड्दा अहिले वीस हजार पुग्छ । त्यो अनुकुलता हेरेर प्रचण्डको रोजाईमा परेको क्षेत्रमा एमालेका श्रेष्ठले कडा चुनौती दिइरहेका छन् ।
